Je fu en fleur ou temps passé d'enfance Et puis après devins fruit en jeunesse ; Lors m'abaty de l'arbre de plaisance, vert et non meur*, Folie ma maistresse. Et pour cela Raison, qui tout redresse A son plaisir, sans tort ou mesprison**, M'a a bon droit, par sa tresgrant sagesse. Mis pour meurir ou feurre de prison***.
En ce j'ay fait longue continuance, Sans estre mis a l'essor de largesse ; J'en suy contant et tiens que, sans doubtance, C'est pour le mieulx, combien que par peresse Deviens fletry et tire vers vieillesse. Assez estaint est en moy le tison De sot desir, puis qu'ay esté en presse**** Mis pour meurir ou feurre de prison.
Dieu nous doint paix, car c'est ma desirance ! Adonc seray en l'eaue de liesse Tost refreschi et, au souleil de France, Bien nettié du moisy de tristesse. J'attens bon temps, endurant en humblesse, Car j'ay espoir que Dieu ma guerison Ordonnera ; pource m'a sa haultesse Mis pour meurir ou feurre de prison.
ENVOI
Fruit suis d'yver qui a meins de tendresse Que fruit d'esté ; si suis en garnison Pour amolir ma trop verde duresse, Mis pour meurir ou feurre de prison.
(*) mûr (**) injustice (***) pour mûrir sur la paille de la prison (****) enfermé
