Du pouvoir merveilleux et estrange desir de son amour
J'estois tout seul entier dans mon essence, Au paradis de l'amour de moy-mesme, Et mon esprit, en ce logis supreme, Se reposoit sus ma douce indolence :
A mon resveil, je vy en ma presence Celle moitié de mon tout, que plus j'ayme Estre sans moy, cause et principal theme De ceste mort, que j'ay par son offense.
Puis que je n'ay donq failli que par toy, En qui je voy la meilleur' part de moy, Souffre avec moy ceste peine mortelle :
L'homme duquel tout homme est descendu, Puni d'avoir prins le fruit defendu, Piteusement faisoit sa plainte telle.
